? ??????????????Hello Kitty? ????? ?? ???Rating: 4.2 (314 Ratings)??3 Grabs Today. 29579 Total Grabs. ????
??Preview?? | ??Get the Code?? ?? ?????Winnie the Pooh? ????? ?? ???Rating: 4.3 (181 Ratings)??3 Grabs Today. 18460 Total Grabs. ??????Preview?? | ??Get the Code?? ?? ????2?? ??????? BLOGGER TEMPLATES AND TWITTER BACKGROUNDS ?

السبت، 28 نوفمبر 2009

زرت بابا وادانى جوااب




السلام عليكم

انا رحت لبابا اول امبارح يوم الوقفة
صحيت بدرى الساعة 3 ولبست هدومى انا واريج ونزلت انا وماما واخواتى الساعة 4 وركبنا العربية وعدينا على تيتا
وانا فى الطريق اتسحرت وبعدين الفجر اذن وصليت فى العربية انا كنت واخده معايا طرحة علشان الصلاه
وبعدين وصلنا الساعة 9 احنا اتأخرنا فى الطريق علشان تهنا معرفناش الطريق بتاع بابا

حطينا الشنط واتفتشت والناس اللى هناك فتشونا وبعدين دخلنا وفضلنا مستنيين كتيييير وبعدين دخلنا فى حته كماان وسجلنا اسمائنا
وبرضو فضلنا مستنيين وبعدين جم فنشونا تاااااانى بس بقى بهدلوا الاكل اللى جايبينه لبابا وكسروا العيش وروموا المخدة والبطانية اللى كنا جايبينها ومش رضويوا يدخلوها واصلا المكان هنااك وحش ومش نضييف خاااااالص وكنت هعيط وفضلت ادعى على الظابط الوحش اللى بهدل الحاجة وبعدين
يدخلونا ودخلوا الحااجة

وبعد كدا شوفت بابا واخدته بالحضن وقعد يبوس فيا وقالى وحشتينى خالص انا مبسوطة انى شوفته وكلمته

وكماااااااااااان ادناانى اللعب جمييلة وادنى اخويا واختى الكبااار مصحف جميييل
وكمااااااااان ادانى انا وارييج العدية بتاعة العيد

وادانى جوااب جمييل خالص وفيه كلام حلو
وقالى اخلى بالى من اخواتى ومش ازعلههم واسمع كلام ماما
واخلى بالى من المذاكرة
وكماان جوااب فيه قصتييت هبقى احكيهم هنا مرة تانية

وكمااااان اسلم علي كل الناس اللى بيدخلوا عندى المدونة كتييييييييير
وعلى المدرسيين اللى باخد عندهم درس

وقعدت ساعة وروحنا تاانى البيت وانا مبسوطة خااالص


انا اتعلمت حاجاااااات كتيييير من بابا

1- انى احب الاسلام واضحى علشانه
2- انى احب القرأن
3- انى احب المذاكرة علشان اكون زييه كدا دكتورة فى الجامعة
4 - انى اعمل اى حاجة علشان ربنا يحبنى
5- ان ربنا لما يعمل فينا حاجة اقول الحمد لله
6 - ان ربنا بيختبر المسلم علشان يشوفوا انسان كويس ولا لا واقول الحمد لله ولا لا
7 - انى احب اخواتى وماما وكل الناااس
8 - ان كل دقيقة بابا بيقعدنا فى السجن بناخد منها حسنات
9- اساعد الناس مهما كانت الظروف
10- انى ادعى ربنا كتيييير واصلى ومش اسيب فرض
وحااجاات كتير خالص بس دول اللى فى بالى دلوقتى

*****************************************

نروح بقى ليوم العييد

انا حضرت هدومى انا واريج ونمنا ولما صحينا صلينا الفجر ولبسنا ونزلنا الساحة علشان العيد
وبعدين فضلنا نلعب هناك فى المراجيح وركبنا العربية ورحنا لتيتا وفطرنا هناك وبعدين روحت على بيت العيلة
وشوفتهم وهما بيدبحوا الجاموسة وبعدين دخلت جوا فى الجنينة وركبت المراجيح انا وبنات خالتى وخالى وولاد خاللى
وبعدين رحت عند خالت بابا وقعدت هناك كتير واتفرجت على التليفزيون وجبت حلويات ونمت

والنهاردة عمتو زارتنا وبعد شوية هروح المراجيح بتاعة العيد
ومش عارفة بقى هعمل ايه تاانى

كل سنة وانتم طييبين

الخميس، 26 نوفمبر 2009

اعتذاااااار


تحديث :

انا مسحت البوست اللى فات وعملته تانى علشان فيه واحد مش محترم دخل وكتب كلام مش محترم وشتم فى الرسول
عذرا يارسول الله
لو هما عرفوه هيحبوه
لكن مش هنقول غير حسبى الله ونعم الوكيل
وعايزة مكنكم بس لو بتحبوا الرسول
انكم تفضلوا تصلوا عليه
اللهم صلى على محمد وعلى ال محمد كما صليت على ابراهيم وعلى ال ابراهيم
وبارك وسلم على محمد وعلى ال محمد كما باركت على ابراهيم وعلى ال ابراهيم
فى العالمين انك حميد مجيد


دعواااتكم بقى ليا ولبابا ولماما واخواتى ولدموع القمر




ازيكم وحشتونى جدا
انا جاية بقى النهاردة علشان اقولكم على كام حاجة
هبدأ بحاجة انا كتبتها اول امبارح اسمها بحبك يامصر

بحبك يامصر
ياام الدنيا
بحبك يامصر
يابلدى الحلوة
مهما تعملى فيا انا مش زعلانة
بحبك وبحب شعبك وبحب ارضك
وبحب نيلك وبحب ازور اهرماتك واثارك الخالدة
وبحب كل حاجة فيكى وبحب اللى يحبك
وبرضو مهما تعملى فيا انا مش زعلانة
عارفة ليه
علشان انت بلد عظيمة فيكى كل الخيرات وبشكر ربى انى عشت فيكى
تاريخك عظيم وشعبك جميل
بنى الاهرامات وصنع حضارات وكمان عبر قناه السويس
والاجانب بييجوا يزوروكى علشان يشوفوا اثارك
عرفتى ليه انا بحبك يامصر
انا مش زعلانة منك خالص
بس رجعليلى بابا خلاص
*******************************************************


والتااااااااااااااااااانية انا اخدت شهادة تقدير النهاردة من المدرسة
انا كنت عايزة احطها هنا بس ربنا يسامح بقى الناس
اللى اخدت الكمبيوتر التانى بتاعنا والطابعة وكل حاجة تبع بابا
المهم
انا كنت فى المدرسة ووافقة فى الطبور وبعد التمارين قبل مانقول علم مصر
لقيت المدير بيقول احنا بنحب نكرم البنات والاولاد المتفوقين
ولقيته بيقول اول اسم ايثار جمال عبد الواحد
انا اتخضيت لما نادى اسمى والله وبعدين سلم عليا
وادانى شهادة تقدير شبه اللى فى الصورة دى هى مش شبهها اوى يعنى
ودا لانى متفوقه علميا واخلاقيا وادانى
كماان برواز كبييير عليه ورد جمييل خالص
انا اتبسط خالص وروحت وقولت لماما وهى باستنى وفرحت خالص
وقالتلى شوفتى البنات الشاطرة اللى بتذاكر وبتسمع الكلام وبتحفظ القرأن
المدرسين بيكونوا مبسوطين منها خالص وبيدوها شهادات تقدير
وكمان لما تذاكرى بابا هيحبك وهيكون مبسوط وعايزينك كدا تكونى متفوقة كمان وكمان

********************************************************

دى بقى علشان العيد هههههه
هى صور عجبتى خالص وضحكتنى فقولت احطها هنا



دا عاوزة يلبسوا ويعمل الحمار خروف العيد هههههه

دا هربان من الجزار وراح يسكن مع البطريق

ودول مبسوطين وبيرقصوا ههههههه علشان مش هيدبحوا


***********************************

وكماااااان عايزة اقول حاجة على بابا
والله بابا طيب خالص ومش وحش زى مافيه ناس فاكره
بابا عمره ماعمل حاجة وحشة ولا زعل حد
وبيحب الخير لكل الناس والبلد كلها زعلت لما بابا اخدوه
بابا دا انسان عظيم اصلا
لانه محدد يوم فى الاسبوع لازم ياخدنا يفسحنا
وبيروح الشغل فى العيادة او المستشفى
وكمان بيروح والجامعة وبيرحع يذاكر علشان الاستاذية
ومش معنى انه اخده الاعتقال يبقى حد وحش او انه مهمل فينا
او مش عاملنا اهتمام
بالعكس والله لو كان مشغول يفضى نفسه علشانا ويقعد يذاكرلى ويحكيلى قصص
ويلعب معانا انا واريج ومبزعلناش خالص
هو عمره ماعمل حاجة غلط علشان ياخدوه
هو لما ينصح الناس ويقولها دا صح ودا غلط كدا يبقى وحش لا
بس هو اخدوه ظلم هو كان معزوم عند واحد صحبوا
وهما قاعدين بياكلوا
جم الظباط واخدوهم كلهم من البيت بتاع صاحبوا
والظابط اداهم افراج علشان هما مش عليهم ذنب بس هما
بقى مش رضيوا يطلعوا بابا ربنا يسامحهم بقى
وانا حاطة الصورة وكل مرة هحطها علشان هو بيوحشنى فباجى اشوفوا وامشى



واخر حاجة بقى
كل سنة وانتم طيبيييين
ويارب العيد يكون سعيد

وكمان انا هبقى اجى احكى ايه عن يوم العيد
انا خلاص هلبس هدوم العيد
وهنزل اتفسح وهروح اصلى
وهعمل كل حاجة بابا قالى عليها

***


والسلام عليكم


الخميس، 19 نوفمبر 2009

للـــــــذكـرى


دا بابا حبيبى هو حياتى هو عنيا انا من غير بابا بحس ان حاجة نقصانى
ياااااه لو تعرفوا انا كنت فرحانة ومبسوطة قد ايه ان بابا اخد افراج
رحت انا واريج وجبنا زينة وعلقناها فى الشقة
وجبنا لوح وكتبت عليها وحشتنى يابابا وبحبك اوى ربنا يخليك لينا
وفضلنا مستنيين بابا وبابا مجاش

اتصلنا على عمو المحامى قال فيه محكمة بكرة تانى وبعديها اتصل علينا وقاااال افراج والحمد لله
فرحت اوى وقعدت اتنطط انا واريج وفضلنا مستنيين بابا وبابا لسة مجاش

رجعت النهاردة من المدرسة لقيت ماما بتعيط واخواتى
بسالهم قالولى بابا اخدووووووه تانى

مع ان القاضى قالهم انكم افراج لانكم مفيش دليل على كلام الظباط
ورغم كدا اخدوا واخدوا روحى معااه انا مسكت نفسى ومرضتش اعيط وجيت اكتب لكن عيطت لانه هيوحشنى اوى
ولانه مش هيحضر معانا العيد

عارفييين هما كانوا 25 طلعوا 20 واعتقلوا 5 ومنهم بابا وكمان ودوه برج العرب اللى فى اسكندرية دى
مش حرااااااام عليهم اللى بيعملوه دا
يحرمونى من بابا طب يحضر معانا العيد بس
بعد مافرحنا نكودا علينا حسبى الله ونعم الوكيل



ودى انا واريج اخر مرة بابا كان فيها معانا
اخدنا دريم بارك وفسحنا ولعبنا
مش عارفة هيرجع تانى ويلعبنا ويفسحنا ولا لا
ربنا يرجعك بالسلامة
طب كانوا يقولوللنا هيفضل بعيد عننا لغاية امتى
لكن هما قالوا اعتقااال طب لغاية امتى ؟؟
ياترى هيضلع وانا لسة صغيرة
ولا هيطلع لما اكبر
ربنا يرجعه بالسلاااامة

انا قولت انى هعمل حفلة وهتكون فيها حلويات
بس خلاص بقى معلش

وانا هصبر وهقول يارب زى ماعادل قالى
اتعودي اي حاجة تجي وحشة لاقدر الله اعرفي ان ده عشان ربنا منع الاوحش منها

وهقول زى مافقرى قالى قولى يارب تبقى احسن يا بلدى

ومش هزعل زى مازهور الامل قالتلى

انتي المفروض انك تفتخري بابوكي لانهم اخدوه في شيء يشرف وهو انه بيدعي لطريق الهداية والدين والاسلام

وهقول زى ماقال يوسف انا لله وانا اليه راجعون

بسم الله الرحمن الرحيم

"وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ ۗ وَبَشِّرِ الصَّابِرِينَ ﴿155﴾ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ ﴿156﴾"

وهعمل زى مادكتور احمد قالى
عمرى ماهضعف ولا اعيط ولا اى حاجة
وهذاكر وانجح وهكمل حفظ القرأن وهخلى بالى من اريج ومن ماما واخواتى وهسمع كلامهم ومش هزعلهم ابدا

ودعواتكم بقى علشان فيه نونو جاى قريب
بس كان نفسى يجى وبابا موجود

يااترى هترجع امتى يابابا ؟؟؟
هسمع صوتك تانى ؟؟؟
هحضنك تانى ؟؟

انتوا عارفين ايه اللى صبرنى
ان الظابط الطيب اللى كان مع بابا فى العربية خلاه يتصل علينا ويكلمنا ويطمن علينا
وعلشان كدا انا مبسوطة شوية

هو قالى البسى هدوم العيد وانزلى وروحى صلاة العيد والعبى وروحى المراجيح زى كل سنة
انا قولت مش هروح بس هو خلانى اوعده

انا عندى امل انه يطلع قريب


معلش والله انا كنت عاملة المدونة دى علشان اكتب فيها القصص
بتاعتى
بس هما جم اخدوا بابا
بس بقى قولت اكتب فيها كمان اللى مزعلنى
وبكتب فيها كل حاجة






الأحد، 15 نوفمبر 2009

وبابا اخد افراااااااااااااج







انا مبسووووووووووووووووووطة جدا
لييييييييه بقى
لان بابا اخد افراج

مش انا قولتلكم ان العرض يوم السبت
وهما حكموا 15 يوووووووووم

وبعدين لقينا عمو المحامى بيتصل علينا وقال انهم اخدوا افراااااااج وهيطلعوا بعد 24 ساعة

انا قولت اجى افرحكم وامشى

واكيد هاجى تاااااانى وهحتفل بعيد ميلادى زى ماوعدتكم

وانا بقول الحمد لله ان بابا هيحضر معانا العيد
انا كنت بعيط ان اول عيد بابا مش هيكون معانا

بس طبعا اول مااخد بابا فى حضنى ويبات معانا

انا هاجى واعمل حفلة كبييييييييييرة وهيكون فيها حلوياااااااااات كتيييييييييرة

انا بحبكم اوووووووى والله

وبجد مبسوطة من الناس اللى كانوا بيعدوا لبابا

الثلاثاء، 10 نوفمبر 2009

واخدت بابا فى حضنى

النهاردة احسن يوم فى حياتى
انا مبسوطة انى شوفت بابا
واخدته فى حضنى
ماما قالتلى امبارح انا واريج اننا هنروح نزور بابا انا مكنتش مصدقة لاننا المرة اللى فاتت مرضيوش يدخلونا
فضلت انا واريج صاحين وعمالين نتكلم ومش جايلنا نوم
وبعدين نمنا وصحينا رحنا لبابا انا واريج واحمد وماما وتيتا وجدو وعمو
و بنت خالتو جت بعدينا
ووصلنا الساعة 11 وفضلنا مستنيين لغاية الساعة واحدة ونص
وبعدين الظابط نادا على اللى موجودين احنا مصدقناش وجرينا كلنا وعيطنا من الفرحة
وانا اول واحدة دخلت بابا وجريت عليه وحضنته ولف بيا وقعد يبوس فيا انا واريج
وبعدين الباقى دخل وقعدنا معاه شوية صغيرين وبعدين قالوا الزيارة انتهت
انا قعدت معاه وقولتلوا كل اللى فى قلبى
انى بحبه وانى بجد محتاجة له وان البيت وحش من غيره وانى محتاجاه لانه هو اللى بيذاكرلى الحساب والانجليزى
وهو اللى بيلعب معانا انا واريج
بس بقى اتغااااظت لما لقيت اريج طلعت لبابا ورقة وادتها لبابا (جواب )
اريج هى مبتعرفش تكتب لانها لسة صغيره بس ملت احمد اخويا وهو اللى كتب
انا زعلت لان هى مش قالتلى بس مش مشكلة
بابا جبلنا حلويات وعصير وسبوع كمااان بتاع مرات واحد معاهم ههه
ومشينا طبعا اانا عنيا دمعت بس مسحتها على طول

وانا اتبسط انى حضنته وشوفه لانه وحشنى بقالى اسبوعين مشفتوش

اااااااه
علفكرة انااا تمييييييت 10 سنين
واريج تمت 6 سنين الشهر اللى فااااات
بس انا مش هكون مبسوطة ولا هحتفل بعيد ميلادى غير لما بابا يطلع بالسلامة ان شاء الله

هو قاااالى ادعيلى ان العرض يوم السبت وياااااااارب يطلعوا
وقالى انه مبسوط انى عملت مدونة وبكتب اللى انا عايزاه فيها
وقالى خلى بالك من مذاكرتك وقرانك واوعى تزعلى ماما واخواتك

انا بحب اكتب هنا علشان بقول اللى انا عايزاه
وبحبكم اوى